Congratulations GuhitPinoy Dubai!
Isang malaking karangalan para sa ating mga Pinoy Artists ang mapabilang sa mga exhibitor ng Global Village, Philippine Pavilion. Iilan pa lang tayo sa mga nabigyan ng pagkakataong makapagpakita ng ating mga dibuho at masterpieces with a global audience dito sa Dubai. Napakainit ng pagtanggap 'di lang ng ating mga kababayan pati na nang ibang mga lahi sa ating mga likhang sining. Masasabi nating nakalikha na tayo ng ugong at hindi nga kaila na may mga imbitasyon na tayo sa iba't-ibang industriya at establisimiyento dito sa UAE.
Dahil dito, itinuturing ngayon na ang exhibit ng GuhitPinoy Dubai ay isa sa mga matagumpay na Art Exhibit ng mga Filipino dito sa bansa, at ito ay nagsilbing sinag para sa iba't-iba pang organisasyon na magsagawa ng pareho ring adhikain. IKAW kaGuhit ay isang inspirasyon sa mga katulad mong artist para magkaroon ng lakas ng loob upang ibahagi at ipakita ang galing ng tunay na Pilipino.
Marami ang napangyari at natutunan ang bawat isa sa atin sa kaganapang ito. Nandoon na natalisod tayo sa mga problemang dumating, na-excite sa mga activities na gagawin, nagulat sa mga di inaasahang pangyayari sa buhay ng ating mga kasama. Subalit sabi nga ni Oscar Wilde... "Life imitates art far more than art imitates Life."
Kung kaya para sa akin ang istorya ng GuhitPinoy Dubai ay parang isang malaking canvas. Nakapagsimula na tayo at nagawa na natin ang "Unang Guhit." Marami pang puting espasyo ang di nadudungisan at higit pa ang pintura at pinsel na hindi nagagamit. Nasa iyo na KaGuhit kung ano ang susunod mong hakbang.
Sa ngayon, isinaayos na ang ating pormal na membership sa Embahada ng Pilipinas at ang ating exhibit sa Philippine Pavilion ang magiging susi upang tayo ay tanggapin ng walang alinlangan. Sa darating na buwan ay magkakaroon tayo ng serye ng pagpupulong para sa mga hinaharap na aktibidad at inaasahan ng bawat isa ang inyong partisipasyon.
Samantala, sa ngalan ng GuhitPinoy Global, batiin natin ang GuhitPinoy Dubai ng isang makabayan at mapagpalayang tagumpay sa larangan ng Sining Pilipino.
Mabuhay tayong lahat!
